Mingəçevir Mələkləri

Vətən, torpaq bizə anamız qədər əzizdir. Biz ailəmizi necə qoruyuruqsa, vətənimizi, torpağımızı da eləcə qorumalıyıq. 44 günlük Vətən müharibəsində sinəsini güllə qabağına verib, Vətənini canı-qanı bahasına qoruyan oğullarımızdan bir çoxu da məhz mingəçevirli idi. Lakin çox təəssüf ki, bu qədim diyarın yetişdirdiyi vətənpərvər oğullardan 53 igid qızğın döyüşlər zamanı şəhidlik zirvəsinə ucaldı. Biz bu kitabda Vətən müharibəsində qəhrəmanlığı ilə tarix yazan Mingəçevir şəhidlərindən Həmidov Pərvini, Hüseynov Əzəmini, İbrahimov Alimi, Eylasov Cəfəri, Məmmədli Məhəmmədi, Məmmədov Məhyəddini, İsgəndərov Niyazini, Əmirov Emili və İbrahimov Atiqi daha yaxından tanıyacağıq. Kitablar tarixə salınan izdir. Qanıyla tarix yazan oğullarımızı əbədi olaraq yaddaşlara yazan yeganə vasitə kitablardır. Kitab gələcək nəsillərə mirasımızdır bizim. İllər boyu dərd-kədərlə yad etdiyimiz tarixlər qəhrəmanlarımız sayəsində zəfər günləri ilə əvəz olundu. Göz yaşlarımız qələbə sevincinə döndü. Mən bu kitablarla bizə qələbə sevincini yaşadan oğulları gələcək nəsillərə də xatırlatmaq istəyirəm. İstəyirəm ki, illər keçsə də Qarabağ deyiləndə, bütöv Azərbaycan deyiləndə, vətəninə azadlıq üçün qanad olan şəhidlərimizi, cənnət mələklərimizi heç kəs unutmasın!