EVLİLİK VƏ ƏXLAQ

Böyük ingilis riyaziyyatçısı və filosofu Bertran Rasselin 1929-cu ildə yazdığı “Evlilik və əxlaq əsəri öz dövrünü qabaqlayan, bu günümüz üçün də aktuallığını itirməyən ideyalarla zəngindir. İnsanların azadlığı və xoşbəxtliyi üçün maneəyə çevrilən köhnəlmiş əxlaqi prinsiplərin dəyişilməli olduğunu uca səslə dilə gətirən, vəziyyətdən çıxış yolunu göstərməyə çalışan mütəfəkkirlər sırasında Bertran Rassel öncül yer tutması ilə seçilir. Təsadüfi deyildir ki, Rasselin 1950-ci ildə, Ədəbiyyat üzrə Nobel mükafatı almasında böyük rol oynamış “Evlilik və əxlaq kitabı ilk nəşrindən keçən onilliklər ərzində ən çox oxunan kitablar sırasında qalmaqda davam etmiş və Qərb dünyasında yenilikçi əxlaqi-mənəvi dünyagörüşün formalaşmasında böyük rol oynamışdır. Geniş oxucu kütləsinə ünvanlanmış əsərini anlaşıqlı və oxunaqlı esse janrında yazan Rassel ailənin yarandığı dövrdən başlayaraq keçdiyi tarixi inkişaf yolunu araşdırmış, onun gələcək inkişafında hansı istiqamətlərə yönələcəyi ilə bağlı maraqlı və düşündürücü hipotezlər irəli sürmüşdür.